Christu Thinglamtah Neh Puai (September-14)

            Christu Thinglamtah Neh Puai (September-14)

            A hlan ih sual hrem nak le thih nak tiih duh san a nei mi thinglamtah cu Bawi Jesuh thawn vancungram ih thlen thei nak lilawn vek a si. Mithianghlim Paul in (IKor 1:23-24) ah, "kan nih cun thinglamtah ih an khen mi Khrih kan phuang ih cuih thu cu Judah mi pawl hrangah rilhbah nak a si ih Grik mi hrangah cun aat hna a si. Sikhalsehla Pathian ih a kawh cia mi pawl hrangah cun Judah mi siseh Zentail mi khal sisehla, cuti kan phuan mi cu Khrih asiih Khrih cu Pathian cah nak le Pathian fim nak a si. (Lk 9:23) sungah, "zokhal sisehla ka dung i thlun tu cun titin ten a mai thinglamtah phur in i thlun seh" tin Bawi Jesuh rori ih timi a si. Bawi Jesuh thinglamtah a neih nak puai cu kum 629 ih an tong sal mi a thianghlim zet mi thinglamtah rothil thawn pehtlaih nak an nei.

            Jesuh Khrih an phum theh hnu a mai thinglamtah cu a dungthluntu pawl ih hmu lo dingah kua pakhat ah an thlak ih leilung le lungto thawn an khuh. Kum 326 ah Constantine Siangpahrang ih nu Mithianghlim Helena in thinglamtah an thuh nak a rak hmu ih a thianghlim zet mi biak in pakhat ah a rak ret. Kum 614 ah Persian miphun in Palestine an neh ih man nei zet mi thinglamtah rothil an lak sak. Kum 629 ah Constantinople Siangpahrang Heroclius in Persian miphun pawl an neh hnuah a thianghlim zet mi thinglamtah cu Jerusalem ah an phur sal. A mah rori in thinglamtah cu a phur duh nan khuapi luh nak sangka a thleng hnu a feh pi thei nawn lo. A kiang ih um mi Purgatory Zakhri cu Siangpahrang kha a sunglawi zet mi sin fen le thinglamtah ih (Bawi Jesuh ih) thin niam nak a bang awk lo mi kha ruah nak tha thawn a rak sim. Cu mi ih ruah nak a pek nak vekin a mai sinfen pawl a phoih ih buri hnipuan a hruk lawngah hi Christu thinglamtah cu a mai um nak kel ah a ret sal thei a si.

            Hi thinglamtah neh nak puai thu kan zoh tikah Siangpahrang in a mai Siangpahrang si nak thuam hnaw thawn thinglamtah a feh pi tum tikah a feh pi thei lo. Hnipuan tha lem lo thawn a feh pi lawngah a feh pi a si ti kan hmuh nak in ruah ding tampi a um a si. Bawipai duh nak tuah dingah cun minung sinak le len nak thawn kan tuah a si ah cun Bawipai duh daan thawn a kaih aw lo ti khal kan hmu thei. Mi hrek cun Biakinn le khawm nak ih kan feh tikah sui le ngun hnipuan tha bikbik hril in kan feh tikah Bawipai duh daan thawn a kaih aw maw? tin khal cu kan ruah dingmi pakhat asi. Curuangah nitin kan thinglamtah phur tlang uh si. Thinglamtah phurh phah in Bawipai duh nak thlun tlang uh si.

https://www.youtube.com/watch?v=IVPe452AnNY