Vancungmi Michael, Gabriel le Raphael tei puai ni (September 29)

Vancungmi Michael, Gabriel le Raphael tei puai ni

September-29

          Thlarau lawng ih um mi Vancungmi pawl cu leilungpi a um hlan in a sang zet mi si nak in Pathian ih sersiam mi an si. An mah cu ruangpi nei lo mi thlarau an si. An mai hmin pawl cu an tuah an tuan nak par ah Pathian hnenih an ngah mi a si.

          “Pathian thawn” ti duh san mi Michael cu setan pawl do dingah tuanvo an pek ih Pathian ih huham a long tum tu Lucifer cu Vancungmi ih dawi dingah an fial. Cu le Vancung ah raldo nak a um. Michael le a mai Vancungmi pawl cu rulhreng an do. Rulhreng cu um nak a nei lo,” tiin Thuphuan 12:7-8 sungah kan hmu thei.  

          Michael cu nitin ten satan ral kan do nak ah in bawmtu a si. “Cui satan pawl cu leilung a cem tikah an sung can a thleng leh ding” tiin Thuphuan 20:10 sungah a um.

          Vancungmi Gabriel cu Pathian ih thazaang cah nak tiin Pathian ai ih tum le kau zet mi a uk nak ram thu than dingah tuanvo pek mi a si. A mah cu Nunau thianghlim Maria hnenah Bawi Jesuh ih suah nak ding thuhla rak than tu a si.

          Bawinu in fala him a si thu a sim tikah Vancungmi Gabriel in “Pathian in ti thei lo mi a nei lo,” tiih a rak ti mi cu Lk 1:37 sungah kan hmu thei.

          Raphael cu taksa le thlarau lam ih dam lo tu pawl dam ter nak dingah tuanvo pek mi a si. Tobia ih khualtlawnnak lamtluan ah a kilhim ih a nupi neih zaan khal ah khuavang ral lak ihsin rak humhim tu a si.

          Vancungmi pathum pawl puai kan hman nak in thlarau sia lak ih tlangleng mi kan si bangin cui thlarau ih tuahmawhnak, sualforh nak lak in kan luat thei nak dingin siseh, Bawipai tirhfung a palai tha kan si ve thei nak ding hrangah siseh, Vancungmi Raphael cu taksa thlarau hmangih sibawi, tamaataw a si nak in kan taksa thlarau le thinlung a dam lo mi kan mah pawl hrangah thla in cam sak aw tiin thlaza cam tlang uh si.