Mithianghlim John of Capistrano (October-23)

Capistrang khuapi ih Mithianghlim John (1386-1456)

October-23

          Franciscan kaing ih hminthang zet mi Pathian thusimtu pakhat a si mi Mithianghlim John cu Italy ram, Capistrano khuapi ah 1386 ah a rak suak.

          Upadi daan thu lam ih fimthiamnak in doctorine buaih a ngah hnu ah Perugia ram uk tu ah tuanvo an rak pek. Cui hmun ah mi mawi zet mi le famkim zet mi nunau pakhat thawn an rak thi aw.

          Kum 1416 ih a cang mi Perugia le Malatesles ram pawl karlak ih raldonak ah an rak kaih ih thawng an thlak. Cui hnu ah a nupi thawn mi zapi theih in an then aw ih Franciscan kaing sungtel pakhat ah a rak cang.

          A hlan a nunram thleng sal dingah Perugia ram tluan ih a rak tuah mi sualnak pawl hmuahhmuah orh in rang pakhat to in a rak feh. Sal vek ih nuntuzia pawl thawn Friar Miner ah luh a rak dil. Cui caan ah kum 30 a si nain a voikhat nak Missa  san nak hman a rak ngah hrih lo.

          A lut duh tu tlawng hotu u pa cu a mai kawh nak ih thianhlimnak a cek feltu a nasa zet mi nuncan remnak a rak tuah. Cui thil pawl cu John in zumnak le tangdor nak thawn a rak tuar.

          Kum 1420 ah Puithiam cannak a rak ngah. Cui hnu ah Pathian thuthangtha a rak sim thok ih Italy, Germany, Hungary ram pawl ah hlawhthlinnak tampi a rak ngah.

          Kum 1456 ah Pope ih tuanvo hleice pek nak vek in Turks miphun pawl thawn ral a thawh lai ah crusade ralkap pawl hnenah feh in thuthangtha a rak phuang.

          Turks miphun pawl in Belgrate khuapi an kulh ih Europe pumpuluk do awk zik te caan a si.

          John in 70,000 hrawng crusade ralkap pawl ih sun nak in hlawhtlinnak ah hmai a rak hruai. A van siat nak ah cui hnu thlathum rei ah Mithianghlim John cu natsia suan a tuar ih a thi.